Senatè WILLOT JOSEPH konfime ke l resevwa 100 MIL DOLA VÈT nan men PM nome Fritz William Michel pou l te ka vote l nan seyans ki te dwe fèt nan jounen mèkredi 11 septanm lan.

Pou yo te ka ratifye PM Michel, tout Palmantè majorite yo jwenn lajan, machinn blende ak anpil lòt avantaj. Genyen ki jwenn 75 MIL DOLA VÈT,  gen 5 lòt ki jwenn 100 MIL DOLA meriken pou yo chak. Ann koute emisyon Matin Débat 16 septanm lan…  

Eske KEDLER AUGUSTIN resevwa 100 MIL DOLA tou tankou 4 lòt senatè yo? Senatè AUGUSTIN di li pa nan lis senatè ki resevwa 100 MIL DOLA a. Eske sa vle di ke li resevwa plis ke sa?

Senatè Augustin pa nye ke tout senatè “majorite” yo toujou resevwa lajan chak fwa pouvwa a bezwen vote yon Premye Minis. Lè konsa, yo pa janm bliye lage yon bagay lan men l tou. Nou konprann pouki sa senatè sa yo pa janm neglije fè eksè zèl pou defann pouvwa Jovenel Moïse la olye yo defann pèp ayisyen k ap monte jodi a lesyèl pado.

Chak fwa pral gen vòt swa nan Chanm depite swa nan Sena a, toujou gen distribisyon lajan likid, machin blende, sak diri, pòs minis ak pòs kòm direktè nan plizyè Ministè ak anpil lòt bwat Leta.

Larepiblik tounen yon veritab poul ke prezidan, ansyen prezidan, direktè jeneral, minis, ti zanmi pouvwa a, senatè ak depite “majorite” yo dwe deplimen san gade dèyè. Poul la te mèt rele, y ap deplimen l kanmenm. Se sa k fè peyi a twouve l nan eta li ye jodi a. Peyi a santi. Fatra toupatou ap fè popilasyon an eksplikasyon. Anpil moun manje yon sèl fwa nan yo jounen, jou sa bon. Pa gen dlo ki koule nan pifò tiyo nan peyi a. Se yon mirak lè gen yon ti kouran. Pifò katye nan peyi a plonje nan fè nwa total. Ensekirite a menm kontinye ap vale teren. Li trè difisil pou yon jou ta pase san pa gen yonn ou plizyè moun ki tonbe anba bal bandi. Chèf gang yo, ke se nan kapital la ou nan pwovens, achte plizyè katye lajan kontan. Yo gen gwo zam manch long. Epi, yo pa rasè pou minisyon. Jouk ki bò sa prale, mezanmi? Devan sitiyasyon san parèy sila a ke popilasyon an twouve l, nou ka di ke pèp ayisyen an se yon bon pèp. Pou konbyen tan ankò, l ap kapab kontinye bouche nen l pou l bwè dlo santi?

Kòm si pèp la pa soufri ase, gouvènman an sou wout pou l monte gaz la. Kisa pèp ayisyen fè l-ap peye?

Lè yon palmantè aksepte resevwa pòs oubyen lajan nan men pouvwa a, nan pòch plizyè gwo chabrak ki nan komès, li tounen ti moun ki nan pye tab zòt. Se pa san rezon ke peyi d Ayiti pa sispann fè bak. Gen moun ki di pito: Ayiti se yon machinn ki kase tèt tounen. M ap mande m si se pa chavire l chavire.

Jodi a, ou bezwen 94 goud pou w gen 1 dola meriken. Depi plizyè jou, popilasyon an se nan goumen pou l rive achte yon ti gaz, menm lè li oblije peye l 3 fwa pri li ta dwe koute’l. Transpò a monte chak jou ki jou, menm jan ak manje ki pa sispann monte tèt nèg.

Pandan ke peyi a ap mal mache, pou n pa di ke l fèmen, sénatè ak depite ak tout gwo chabrak nan pouvwa a ap byen mennen. Chak vòt ta sanble koute pou pipiti 50 MIL jouk-ka 100 MIL DOLA e menm plis selon enpòtans vòt la. Tankou zòt ta di : mezi lajan w, mezi wonga w.

Kedler Augustin di li toujou resevwa yon ti kado chak fwa “Tonton Nwèl” pase. Fwa sila a, senatè a te gen lè t ap dòmi. Sou koze 100 MIL DOLA a, li te yon ti jan pa t twò alèz pou l rive byen defann tèt li nan mikwo VALÉRY NUMA. Ann koute….

Senatè SOREL JACINTHE deklare se nan yon reyinyon ki te fèt lakay Senatè Wilfrid Gélin, ke PM nome a Fritz William Michel distribye 500 MIL DOLA pou 5 senatè pwòch pouvwa a : Wilfrid Gelin, Dieudonne Luma Étienne, Jacques Sauveur Jean, Kedler Augustin ak Willot Joseph.

Willot se sèl senatè ki gen kouraj jouk-kaprezan konfime ke distribisyon an te fèt vre e li te resevwa 100 Mil DOLA VÈT kou yon pye poro. Koripsyon pap fini nan peyi d AYITI. Zòt ta di: SÒT KI BAY, ENBESIL KI PA PRAN!

Papizoup / Pawol La Pale

 

PM nome WILLIAM MICHEL distribye 500 MIL DOLA VÈT a 5 SENATÈ pou yo vote l. WILLOT JOSEPH KONFIME…

https://canalmusiqueplus.com/wp-content/uploads/2019/09/fritz-william-michel-130919-500.jpghttps://canalmusiqueplus.com/wp-content/uploads/2019/09/fritz-william-michel-130919-500-200x200.jpgPapizoupCorruptionSenatè WILLOT JOSEPH konfime ke l resevwa 100 MIL DOLA VÈT nan men PM nome Fritz William Michel pou l te ka vote l nan seyans ki te dwe fèt nan jounen mèkredi 11 septanm lan. Pou yo te ka ratifye PM Michel, tout Palmantè majorite yo jwenn lajan, machinn...      De la MUSIQUE et Plus Encore